O goberno licita a instalación de bombas de augas residuais na Revolta e Arnosa.
O goberno licitou a subministración e a instalación de bombas nos bombeos de augas residuais da Revolta e de Arnosa, por un valor de 33.200€. O prazo para a presentación de ofertas termina o próximo día 3 de xaneiro.
Na Revolta (Noalla) e en Arnosa (Vilalonga) existen actualmente dúas estacións de bombeo de augas residuais que pertencen á rede municipal de saneamento. Cada unha destas estacións posúe bombas de impulsión, que, debido á súa antigüidade, esgotaron a súa vida útil, producíndose continuas avarías. Ademais, isto vese agravado debido ao aumento do caudal respecto a o seu cálculo orixinal, tendo un uso continuo e constante.
En cada unha das localizacións instalaranse dúas unidades de bombas centrífugas somerxibles, adaptadas ao novo caudal, colocadas nos pedestais existentes.