Hai tres versións: o vídeo matriz cunha duración de dous minutos e outras dúas edicións, de 35 e 20 segundos, para anuncios publicitarios.
Sanxenxo, 5 de decembro de 2024.- Sanxenxo amplía o seu material promocional cun novo vídeo no que se resaltan os principais atractivos turísticos do municipio. A peza audiovisual foi elaborada coa liña dous dunha subvención de Turismo de Galicia para mostrar os recursos con potencial turístico no litoral, conseguida a través da Concellería de Turismo e Praias, dirixida por Juan Deza, e dotada con 15.000 euros.
O vídeo amosa Sanxenxo como un destino para calquera estación do ano, en liña coa estratexia que o goberno e, particularmente, a Concellería de Turismo desenvolven desde 2017 e que se resume no lema “Sanxenxo 365 días”. A produtora pontevedresa “Visual VR Producciones” encargouse de elaborar o guión, rodar as imaxes, facer o montaxe e a edición. Elaboráronse tres versións: o vídeo matriz cunha duración de algo máis de dous minutos e outras dúas versións, de 35 e 20 segundos, pensadas para campañas publicitarias en canles dixitais e televisións autonómicas e locais.
O vídeo prescinde de contar unha historia tradicional con inicio, desenvolvemento e conclusión, como se fixo noutras ocasións. A concellería optou por unha linguaxe visual moderna, estilo videoclip, sen locución, só imaxes e música electrónica.
Sanxenxo vive, por riba de calquera outra cousa, das dúas rías que o bañan. Por iso, o vídeo comeza “chegando a Sanxenxo desde o mar”, pero non renuncia a amosar paisaxes de interior e núcleos rurais menos coñecidos, praias para pasear calquera día do ano, a costa, o seu patrimonio ou o avistamento de aves. Estas son algunhas das actividades que xa desfrutan máis de 200.000 viaxeiros que nos visitan fóra do verán, unha cifra que medra ano tras ano.
