O punto de expedición ubicarase na explanada de Baltar, preto do skatepark, e a cita debe solicitarse na Policía Local.

Sanxenxo, 5 de marzo de 2025. – Sanxenxo recibirá o vindeiro luns 7 de abril a oficina móbil de documentación da Policía Nacional, que permitirá nun único trámite obter tanto o DNI como o pasaporte. O punto de expedición estará situado na explanada de Baltar, preto do skatepark, de 9:00 a 14:00 horas.

O Concello, a través da área de Seguridade Cidadá e Emerxencias, dirixida por Xoán Pérez, adheriuse o pasado mes de febreiro ao proxecto Vidoc (Vehículos Integrais de Documentación), co obxectivo de facilitar os trámites e as xestións aos veciños e veciñas, evitando que teñan que desprazarse a outro municipio.

Cita previa: As persoas interesadas deberán chamar ao teléfono da Policía Local (986 72 70 72) para reservar horario. Estímase que poderían programarse ata 25 citas.

 Documentación necesaria para a expedición do DNI

📌 Primeira inscrición:

• Unha fotografía recente (con antigüidade inferior a 2 anos), en cor sobre fondo branco.

• Partida de nacemento literal na que conste que se expide “aos únicos efectos de obtención do DNI” (validez: 6 meses desde a data de expedición).

• Volante de empadroamento (validez: 3 meses desde a data de expedición). Para residentes no estranxeiro: certificado consular de residencia (validez: 3 meses desde a data de expedición).

• Os menores de 14 anos e as persoas con discapacidade deben estar acompañados por un dos proxenitores ou titores legais con DNI en vigor.

📌 Renovación:

• Unha fotografía recente (con antigüidade inferior a 2 anos), en cor sobre fondo branco.

• O DNI a renovar.

• En caso de cambio de datos:

  • Domicilio: volante de empadroamento (recomendado) ou autorización ao funcionario para consultar o Sistema de Verificación de Datos de Residencia. Para residentes no estranxeiro: certificado consular de residencia (validez: 3 meses desde a data de expedición).

  • Datos persoais: partida de nacemento literal (validez: 6 meses desde a data de expedición).

• Os menores de 14 anos e as persoas con discapacidade deben estar acompañados por un dos proxenitores ou titores legais con DNI en vigor.

Taxa: 12 euros (Gratuíto para familias numerosas acreditadas).

Documentación necesaria para a expedición do PASAPORTE

• DNI en vigor (Se solicita a renovación ou duplicado dun pasaporte vixente, deberá presentar o mesmo).

• Unha fotografía recente (con antigüidade inferior a 2 anos), en cor sobre fondo branco.

📌 Para menores ou persoas con discapacidade, ademais:

• Se non ten DNI: partida de nacemento literal na que conste que se expide “aos únicos efectos de obtención do pasaporte” (validez: 6 meses desde a data de expedición).

• Se ten DNI: deberá acreditar a relación de parentesco ou condición de titor mediante a presentación de calquera documento oficial ao efecto (Libro de Familia, partida de nacemento, etc.).

• Os proxenitores (ambos) ou titores (todos) con DNI en vigor deben acompañar ao solicitante.

Taxa: 30 euros (Gratuíto para familias numerosas acreditadas).