O acto de entrega do galardón terá lugar o vindeiro 4 de setembro, ás 12:30 horas, no recinto portuario.

Sanxenxo, 26 de agosto de 2025.- Sanxenxo renderá homenaxe o vindeiro 4 de setembro, coincidindo coa celebración de Santa Rosalía, á ceboleira local Maruja Cacabelos e ao profesor Pepe Álvarez. Estes nomes foron escollidos por un xurado presidido polo alcalde do municipio, Telmo Martín, e a concelleira de Cultura e Eventos, Elena Torres, e que contou coa representación das sete parroquias que conforman Sanxenxo, así como das asociacións Entretendas e o Consorcio de Empresarios Turísticos de Sanxenxo (CETS). O acto de entrega do galardón terá lugar o vindeiro 4 de setembro, ás 12:30 horas, no recinto portuario.

Maruja Cacabelos

María de los Ángeles Cacabelos Domínguez, coñecida como Maruja de Gondariño, leva máis de vinte anos participando na Feira da Cebola, acadando distintos premios e recoñecementos tanto nos concursos da ristra máis longa como nas creacións artísticas. Por iso a súa figura como ceboleira está moi vencellada á cita. As persoas que a coñecen defínena como unha muller intelixente, adiantada ao seu tempo, emprendedora, independente e cunha moi boa man para a horta.

Xunto co seu home Feliciano, falecido o ano pasado, comezou a dedicarse ao campo nos anos 70. Interesados polas técnicas de cultivo, realizaron varias viaxes ao Levante, introducindo distintas variedades de tomates en colaboración cos enxeñeiros agrónomos da coñecida “Extensión Agraria”. Toda a variedade de legumes e verduras que cultivaban vendíana no mercado de Sanxenxo, Vilagarcía e Pontevedra, pero tamén a hoteis, restaurantes e supermercados da zona.

Pepe Álvarez

A vida profesional de Xosé Álvarez Castro sempre estivo moi vencellada a este municipio. Foi profesor do colexio Magaláns durante máis de vinte anos e, posteriormente, ata a súa xubilación, profesor do IES de Baltar-Sanxenxo. Son moitas as xeracións de alumnas e alumnos das diferentes parroquias que lembran ao seu profesor polos métodos pedagóxicos e pola gran capacidade de transmisión do coñecemento.

Pepe Álvarez levaba ao seu alumnado a experimentar fóra das aulas tanto desde un punto de vista histórico como químico ou matemático. Agora, xa xubilado, Pepe non falta á ruta anual que se organiza para visitar as mámoas do Chan da Gorita.

É autor de múltiples publicacións, como artigos ou libros sobre a represión franquista, en concreto o libro “Pontevedra nos anos do medo”.