A recadación das inscricións irá destinada integramente á Asociación Neen@s Sanxenxo
Sanxenxo, 27 de agosto de 2025.- O Paseo de Silgar acollerá este domingo a Milla Urbana de Sanxenxo que cumpre vinte e cinco anos baixo o lema “Abrazando a diversidade”. As persoas interesadas en participar deberán formalizar a inscrición en www.deporticket.com antes de mañá xoves ás 23:59 horas. Os cartos recadados coas inscricións estarán destinados integramente á Asociación Neen@s Sanxenxo que presta atención a familias con nenos que teñen necesidades especiais de apoio educativo.
O concelleiro de Deportes, Marcos Guisasola, e a concelleira de Servizos Sociais, Paz Lago, xunto con membros do colectivo Neen@s presentaron esta mañá a proba deportiva na Rosa dos Ventos. “Cumprimos 25 anos e contaremos con novidades no agasallo por participar, nos trofeos e tamén co avituallamento dos corredores e a animación musical”, explica Marcos Guisasola.
A orde de saída das probas, desde as 12 ás 13 horas, será a seguinte: Prebenxamín, benxamín, alevín, infantil, cadete, junior, afeccionados e veteranos (A, B e C). A distancia será tamén diferente acorde á categoría.
A concelleira de Servizos Sociais destacou o traballo da Asociación Neen@s Sanxenxo e apuntou que “trátase de visibilizar o seu traballo e de sensibilizar á poboación con esta problemática que afecta a moitas familias”. De feito, desde as 10:30 horas, o colectivo habilitará tres recunchos, un con información sobre o posto; outro sobre a Meiga Xesta, supervisora da lectura e escritura dos nenos e nenas da asociación; outro de pintacaras, co que se trata de poñer aos participantes no lugar de personaxes e traballar a empatía.
Plan de tráfico
Con motivo da proba deportiva, cortarase o tráfico rodado no Paseo de Silgar (desde Rúa Madrid ata Rúa Rosalía de Castro) entre as 11:00 e as 13:30 horas do domingo.
Así mesmo, durante o mesmo horario, estará cortada a Avenida Luis Rocafort (excepto residentes). Tamén estará restrinxida ao tráfico a Rúa Madrid ata a Casa Consistorial. Polo tanto, entre as 11 e as 13:30 horas, non se poderá acceder nin saír do parking Nauta.
