O novo contrato, cunha duración de catro anos, aumenta a contía respecto ao anterior en 771.072 euros

Sanxenxo, 27 de agosto de 2025.- O Concello de Sanxenxo, a través do Organismo Terra de Sanxenxo, propón como adxudicataria da xestión das escolas infantís municipais de O Tombo e O Revel a Promoción da Formación Las Palmas, empresa actual concesionaria do servizo. O novo contrato aumenta a contía respecto ao anterior en 771.072 euros ata os 3,1 millóns durante os catro anos que dure o servizo.

Ambos centros educativos teñen unha capacidade de 121 prazas repartidas entre cero a un ano (24), de un a dous (39) e de dous a tres (58) durante o curso escolar que abrangue desde o 1 de setembro ao 31 de agosto. O servizo inclúe a atención educativa, garda e coidado dos nenos e nenas, así como a cociña e elaboración de menús que estarán supervisados por unha dietista.

Cada centro abrirá durante un mínimo de oito horas diarias, en xornada partida ou continuada, cinco días á semana de luns a venres e doce meses ao ano, salvo causa xustificada. Non obstante, respectando estes mínimos, cada centro poderá determinar o seu calendario e horario de apertura e peche ao público en función da demanda existente e da necesaria conciliación da vida persoal, familiar e laboral.

A franxa horaria máxima de apertura das escolas está comprendida entre as 7:00 e as 19:30. Este tramo horario reducirase no horario de apertura ou peche cando o número de nenos con praza sexa inferior ao 30 % do total. Porén, respectarase sempre un horario mínimo de apertura que abranga desde as 8:00 ás 17:00.

O Concello realiza unha forte aposta pola conciliación non só coas escolas infantís municipais senón tamén co Centro de Día, o Servizo de Axuda no Fogar ou o Plan Concilia.