O concelleiro de Turismo e Praias, Juan Deza, recolleu onte os distintivos durante a Gala da Noite Q
Sanxenxo, 23 de xaneiro de 2026.- Sanxenxo recibiu dous novos distintivos de calidade durante a Gala da Noite Q celebrada na Galería de Cristal do Palacio de Cibeles. No acto, conducido polo director xeral do Instituto para a Calidade Turística Española e a Sostibilidade (ICTES), Fernando Fraile, o concelleiro de Turismo e Praias, Juan Deza, recolleu os dous novos distintivos obtidos en 2025: a S de Sostibilidade para a praia de Silgar e a Q de Calidade para a praia de Nosa Señora da Lanzada.
Sanxenxo conta con 60 distintivos Q de Calidade Turística, dos cales 19 corresponden ao sector público e 41 ao sector privado. Dentro do ámbito público distínguense 17 praias, 1 oficina de turismo e Nauta Sanxenxo. En canto ao sector privado, as certificacións distribúense entre 1 adega, 27 aloxamentos, 2 clubs náuticos, 3 axencias de viaxes e 8 restaurantes. En total, a provincia de Pontevedra suma 163 distintivos Q de Calidade Turística.
Ademais, Sanxenxo contabiliza xa 11 distintivos S de Sostibilidade Turística, dos cales 2 pertencen ao sector público —a praia de Silgar e Nauta Sanxenxo— e 9 ao sector privado, repartidos entre 3 aloxamentos, 2 clubs náuticos, 2 restaurantes e 2 axencias de viaxes. No conxunto da provincia de Pontevedra existen 52 establecementos distinguidos coa S de Sostibilidade.
Visita ao mostrador de Sanxenxo
O presidente da Xunta de Galicia, Alfonso Rueda, visitou esta mañá o mostrador de Sanxenxo, acompañado do director Oliver Laxe, cuxa película Sirât vén de ser nomeada a Mellor Película Internacional e a Mellor Son no Premios Oscar 2026; da presentadora Patricia Pardo e da cómica e guionista Carolina Iglesias. Fixérono minutos antes da presentación da nova campaña de Galicia Calidade e antes de coñecerse o premio a Galicia como o Mellor Stand de Comunidade Autónoma en Fitur.
