O contrato que saíu hoxe a licitación supón un incremento de case o 30 % respecto ao ano anterior

Sanxenxo, 16 de outubro de 2026.- Sanxenxo reforza a súa aposta polo Nadal cun incremento de case o 30 % no alumeado público de rúas e espazos públicos. A Concellería de Cultura e Eventos, dirixida por Xoán Pérez, sacou a licitación esta mañá o contrato por 219.326 euros para a colocación dun total de 440 motivos distribuídos entre as sete parroquias do municipio. O acendido está previsto para o venres, 4 de decembro, e o horario diario previsto será de 18:00 a 02:00 horas.

Toda a iluminación proposta utilizará tecnoloxía 100 % LED de alta eficiencia, garantindo un consumo enerxético mínimo. Ademais, as instalacións empregarán equipos homologados e contarán con estruturas de soporte fabricadas en aluminio, un material lixeiro e reciclable.

No plano estético, a iniciativa busca dotar de personalidade propia cada unha das zonas de actuación. O deseño final estará suxeito á aprobación municipal, esixíndolle á empresa adxudicataria un coidado minucioso na selección das cores, a proporcionalidade dos motivos respecto á contorna, a distancia entre elementos e as alturas de montaxe. O obxectivo é lograr un impacto visual harmónico e de alta calidade que embeleza a paisaxe urbana.

Co fin de maximizar o atractivo do municipio, o prego de condicións abre a porta a que as empresas licitadoras presenten melloras decorativas sen custo adicional, como figuras tridimensionais. Todas estas melloras estarán orientadas de forma estratéxica á potenciación, dinamización e diferenciación decorativa das principais zonas comerciais, reforzando o seu atractivo turístico e comercial durante as datas festivas.