A cita, que contará con 150 participantes de ata seis países, celebrarase no pavillón de Baltar
Sanxenxo, 5 de novembro de 2026.- Sanxenxo prepárase para acoller este sábado un evento internacional de Loita Olímpica de máximo nivel, o Memorial Alexander Kachelaev. Con máis de 150 participantes procedentes de ata seis países, a vila vivirá a cuarta edición deste memorial dedicado a unha figura clave no gran impulso deste deporte a nivel autonómico.
Os detalles organizativos déronse a coñecer este xoves no propio pavillón de Baltar. Ao acto asistiron Marcos Guisasola, concelleiro de Deportes de Sanxenxo e deputado provincial de Pontevedra; Guillermo Reinaldo, representante da Secretaría Xeral para o Deporte; José Luis Olazabal, presidente da Federación Galega de Loita; Tatiana Kachelaeva, viúva do homenaxeado Alexander Kachelaev; Rubén Méndez, técnico da sección de Loita do CGTD; Pablo Pintos, director técnico da Federación Galega de Loita; e os integrantes da selección de Moscova de Loitas Olímpicas.
A xornada está organizada pola Federación Galega de Loita e D.A., e conta co respaldo estratéxico do Concello de Sanxenxo, a Deputación de Pontevedra, a Secretaría Xeral para o Deporte da Xunta de Galicia e o Xacobeo 2027. Os combates desenvolveranse no pavillón de Baltar de forma ininterrompida. A sesión matinal, programada de 10:00 a 14:00 horas, estará reservada para as categorías de base U15 e U17. Tras un descanso, a competición sénior reactivará a pista a partir das 16:30 horas, prolongándose ata a clausura ás 20:30 horas.
Para os novos talentos das categorías U15 e U17, esta cita é crucial no calendario oficial. O Memorial Alexander Kachelaev forma parte do exclusivo circuíto do Ranking Nacional xunto a outras tres probas de prestixio: o Torneo Villa de Madrid, o Torneo Maider Unda de Barakaldo e o Torneo Isla de Mallorca. Os puntos obtidos en Sanxenxo serán determinantes para lograr o acceso ás clasificacións dos próximos campionatos europeos e mundiais.
A dimensión e o prestixio do evento continúan en pleno crecemento ano tras ano. O cartel desta edición destaca por unha sobresaliente participación nacional que alcanza os 27 clubs inscritos, aos que se suman cinco potentes seleccións internacionais: Moscova, Portugal, Romanía, Ucraína e Bulgaria. Así mesmo, cómpre salientar o auxe da presenza feminina no torneo, que xa representa o 35 % do total das inscricións.
Para todos aqueles afeccionados que non poidan desprazarse ata o pavillón de Baltar, a organización ofrecerá a retransmisión íntegra da competición vía streaming a través da plataforma oficial www.zenytsports.org.
Sanxenxo: un escenario de éxito deportivo e turístico
A elección de Sanxenxo consolida a traxectoria da localidade como sede de grandes eventos deportivos nos últimos anos. Tras organizar con éxito dous Rankings das Series Mundiais de Loita Praia en 2022 e o primeiro Campionato Galego de Loita e Sambo Praia en 2025, o municipio reafirma a súa posición como un territorio dinamizador de novas disciplinas. A contorna, a calidade das instalacións e a xestión municipal favorecen o crecemento do tecido deportivo local, logrando ademais atraer turismo desestacionalizado e actividade económica fóra da tempada estival.
Como antesala á gran cita do sábado, os deportistas do CGTD de Pontevedra compartiron adestramentos durante toda a semana con loitadores de diversos puntos de España, completando a súa preparación con sesións de combate de nivel nacional. Ademais, nestas xornadas de convivencia participan desde o luns as delegacións internacionais de Moscova nas modalidades de Loita Feminina, Loita Libre Olímpica e Loita Grecorromana. Esta oportunidade única de adestrar con especialistas estranxeiros atraeu ao CGTD a numerosos deportistas de toda Galicia.
