O porto deportivo municipal Juan Carlos I renovou o distintivo S de Sustentabilidade Turística acadado, por primeira vez, o ano pasado.

Sanxenxo, 1 de xullo de 2025.– O alcalde, Telmo Martín, recolleu esta mañá en Madrid as 18 ‘Q’ de Calidade Turística que ondearán este verán en 16 praias (A Lapa, Areas, Areas Gordas, Baltar, Canelas, Caneliñas, Major, Montalvo, Panadeira, Silgar, Foxos e Paxariñas, Area de Agra, Bascuas e O Espiñeiro) e nas oficinas de Nauta e Turismo. Ademais, Sanxenxo renova a S de Sustentabilidade Turística para o porto municipal Juan Carlos I. “Sanxenxo segue apostando pola calidade e pola excelencia nos seus servizos e estes distintivos non son máis que o recoñecemento a este traballo e esforzo”, asegura Telmo Martín.

A XVIII Edición da Entrega de Bandeiras Q de Calidade Turística, Safe Tourism Certified e S de Sustentabilidade Turística a praias e portos deportivos tivo lugar na Secretaría de Estado de Turismo e contou coa presenza da secretaria de Estado de Turismo, Rosario Sánchez Grau, e do presidente do ICTE, Miguel Mirones Díaz.

Trátase dun acto que anualmente convoca o ICTE co obxectivo de recoñecer a todos aqueles concellos que fixeron unha aposta decidida pola calidade, a sustentabilidade e a seguridade nas súas praias e portos deportivos, entre os que Sanxenxo destaca como un dos destinos líderes. O obxectivo é subliñar a importancia da calidade certificada, segura e sustentable como ferramenta indispensable para afrontar os retos que o turismo ten por diante. “A aposta de Sanxenxo pola calidade segue aumentando e isto é un recoñecemento ao traballo ben feito e ao esforzo pola mellora continua”, asegurou o alcalde.