A Escola de Música organiza un ciclo de concertos baixo o título “Sons en Sanxenxo”.

Os dous obxectivos principais do ciclo son enriquecer a formación musical do alumnado matriculado na Escola e achegar aos veciños e veciñas un programa cultural amplo.

Este ciclo está organizado en colaboración co CMUS Manuel Quiroga e a Banda de Música de Sanxenxo e nel mostraranse catro formacións musicais diferentes: concerto lírico formado por voz e piano, música de cámara con tríos e cuartetos de corda, banda de música e orquestra sinfónica.

E é que esta liña de colaboración entre a Escola de Música e o CMUS Manuel Quiroga permite tamén ao alumnado do Conservatorio que está a cursar o grao profesional saír da súa zona de confort e tocar en auditorios diferentes.

O ciclo comeza o xoves 4 de abril cun concerto lírico da aula de Canto do Conservatorio Manuel Quiroga. O xoves 11 será a quenda para os instrumentos de Corda cun concerto de música de cámara.

Entre os días 13 e 16 de abril terá lugar o curso de dirección organizado pola Banda de Música de Sanxenxo. Devandito curso está pensado para aqueles músicos profesionais que desexan canalizar a súa carreira musical cara á dirección de banda ou orquestras. O curso culminará cun concerto da propia Banda dirixida polo alumnado participante e que terá lugar o martes 16 de abril.

O ciclo “ Sons en Sanxenxo” péchao a orquestra do CMUS Manuel Quiroga cun concerto o xoves 25 de abril. Trátase dun concerto diferente pola natureza da propia formación. Ao tratarse dunha orquestra sinfónica a composición é diferente ao dunha banda de música, conformándose principalmente por instrumentos de corda, vento e percusión.

Todos os concertos terán lugar no Pazo Emilia Pardo Bazán e a entrada será gratuíta ata completar aforamento.