O Concello de Sanxenxo liquidará esta mesma semana un problema de seguridade viaria en Bordóns coa substitución das tubaxes de pluviais en dous puntos da estrada de O Sear. O mal estado das canalizacións de pluviais provocou filtracións e perforacións no asfalto supondo un grave risco para o tráfico de vehículos.

O concelleiro de Servizos, Óscar Vilar, supervisou onte o avance dos traballos que se prevé que conclúan a finais desta mesma semana e que conta cun orzamento de 12.000 euros. A obra céntrase en dous puntos do viario no que se substitúen máis de 30 metros de tubaxe e na reparación posterior do firme. Nun dos tramos nos que se está actuando, os traballos obrigaron a cortar o viario ao tráfico rodado xa que se trata dun punto no que é preciso actuar a máis de tres metros de profundidade e no que existe un armazón de tubaxes de saneamento que esixe actuar con maior precisión para evitar danos.

Con esta obra porase fin aos problemas de filtracións e afundimentos do firme nestes dous puntos do viario que é moi utilizado polos veciños de Bordóns e das proximidades. Os traballos atrasáronse máis do previsto pola alerta sanitaria e as choivas do inverno, pero esta semana quedarán listos.