O servizo saíu a concurso por 14.500 euros e inclúe a colocación do microchip dos felinos da rúa
Sanxenxo, 17 de abril de 2024- A Concellaría de Medio Ambiente acaba de sacar a concurso o servizo de control das colonias felinas no municipio. O orzamento do contrato triplica a cantidade destinada ata o momento, 14.500 euros, polo período dun ano e con posibilidade de tres prórrogas. O obxectivo deste servizo é levar a cabo unha adecuada xestión sanitaria das colonias de gatos urbanos de Sanxenxo e a atención veterinaria urxente de felinos da rúa cumprindo a lei de benestar animal, 7/2023 do 28 de marzo e a 4/2017 de protección e benestar animal.
O adxudicatario do contrato deberá recoller os animais entregados por persoal autorizado (membros dos servizos de emerxencias e Policía Local de Sanxenxo, e outras persoas coidadoras ou afectadas de/por colonias sempre que conten con autorización da Concellaría de Medio Ambiente).
O persoal autorizado para a recollida de gatos deberá utilizar unha gaiola trampa ou transportín para a recollida de animais, de non dispor dun, será cedido pola clínica veterinaria adxudicataria do contrato, e poderán recollelo nun punto fixado dentro do municipio, habilitado para tal fin. Nunca se atenderán animais propiedade de particulares. A clínica veterinaria do adxudicatario non poderá estar a máis de 30 quilómetros do municipio para evitar a tensión dos animais durante o transporte.
Colonias felinas
Se os gatos son membros de colonias felinas cuxo obxecto é a esterilización
aplicaráselle o seguinte protocolo:
1.- Recepción e avaliación.
- Control documental e identificación no momento da recepción.
- Os gatos serán sedados para a exploración física, se fose necesario.
- Realizarase unha exploración física xeral para de descartar patoloxías que non aconsellen a esterilización.
- O veterinario determinará o tratamento que de modo xenérico será: desparasitación interna e externa, chip, marcaxe orella, vacinación, esterilización (en caso de non estar esterilizados), realización de ficha e retorno a colonia.
2.- Tratamento ao que vai ser sometido o animal:
- Desparasitación interna e externa.
- Vacinación polivalente e rabia.
- Marcado de orella (das femias realizando un corte transversal dun centímetro na punta da orella esquerda e marcaxe dos machos na orella dereita).
- Implantación de microchip e tramitación do mesmo.
- Esterilización mediante ovario histerectomía en femias (extracción cirúrxica dos ovarios e útero desde a cavidade abdominal) e orquitectomía. En machos (extracción cirúrxica de testículos, epidímimo e cordón espermático).
- Previamente á cirurxía o animal será sedado
3.- Recuperación.
- Unha vez tratado o animal permanecerá na clínica o tempo necesario para a súa recuperación, e ata que coma e beba de modo autónomo.
4.- Toma de datos.
- Levarase un rexistro de todos os animais
5.- Entrega á persoa que o levou para a súa solta no mesmo lugar