O prazo de execución será de dous meses

Sanxenxo, 12 de marzo de 2026.- O Concello de Sanxenxo acaba de adxudicar a Amazing Up a museografía do Centro de Interpretación de A Telleira en Vilalonga por 133.100 euros, cun prazo de execución de dous meses.

A musealización deberá garantir a accesibilidade e a comprensión dos contidos para públicos diversos, atendendo a distintos rangos de idade, orixe, nacionalidade e nivel educativo. A museografía deberá ser atractiva, didáctica e inclusiva, ofrecendo diferentes niveis de profundidade para adaptarse tanto a visitantes ocasionais como a aqueles interesados nun coñecemento máis detallado.

O obxectivo é que o espazo se converta nun foco de difusión dos valores ecolóxicos e etnográficos de toda a zona, que fomente o turismo ambiental e ornitolóxico, especialmente nos meses de outono e inverno, cando máis de 200 especies de aves elixen este humidal para invernar.

O Centro de Interpretación de A Telleira, construído en 2003 e cunha superficie de 2.504 metros cadrados, atópase dentro do Complexo Intermareal Umia-O Grove, un ecosistema de grande valor ecolóxico que forma parte do Listado de Humidais de Importancia Internacional (Ramsar), foi declarado Zona de Especial Protección para as Aves (ZEPA) e está catalogado como Espazo Natural en réxime de Protección Xeral.

O edificio está a ser obxecto dunha mellora integral co obxectivo de que poida albergar as actividades para as que foi concebido, aumentando ao mesmo tempo os seus estándares ambientais interiores e a eficiencia enerxética. Os traballos céntranse agora na colocación da climatización interior.

Ademais, organizarase a parcela circundante para crear un pequeno aparcadoiro delimitado, evitando a dispersión actual de vehículos. A redistribución do espazo interior incluirá a oficina de Medio Ambiente, a sede de SEO BirdLife, unha sala de exposición permanente, unha sala multiusos, un espazo para obradoiros de interpretación, un almacén, un centro de documentación, unha sala audiovisual, unha sala de exposición itinerante, unha tenda temática e aseos.